مصـر هى امـى ولا بتشتـغلنـى؟

مصر هى امى ولا بتشتغلنى؟

انا ابنها وضناها ولابالتبنى؟

بتفرق ليه مابينى وبين اخويا الكبير

تطلع ليه فى عينى لأجل مايلبس حرير

وتقولى اصبر شوية ياضنايه يانور عنيا

امى بتضحك عليا مانا شايف خير كتير

مش لاقى فى بلدى شقه وامى تقولى الظروف

افطر واتغدى دقه واللحمة للضيوف

واخويا ابن اللذينا واخد فيلا فى مرينا

وبسين وكمان جنينا

انا ساكت غصب عنى ماهى امى بتشتغلنى

مش لاقى وظيفه ليا اصرف منها واعيش

ومعنديش محسوبيه وبالتالى دخلت الجيش

وأخويا حظه نار وبيقبض بى الدولار

امى بتديلو كوسه واتصدرلى الخيار